طريقه اختيار العده المناسبه لصيد الاسماك
بسم الله الرحمن الرحيم
انهارده هنتكلم عن موضوع مهم جدا لكل صياد مبتدأ وهوا انت ازاى تقدر تختار العده المناسبه للصيد وازاى تعرف تفرق بين الكويس والوحش طبعا ومع الخبره هتعرف كل ده لوحدك
اولا انت الى بتحدد نوع الصيد الى انت مشدود اليه او نفسك انك تكون بتحب تجربه علشان تشوف العده المناسبه ليه
اول حاجه الصيد فى البحر
الصيد فى البحر طرق كتير وبنستخدم اكتر من عده علشان كل صيد وليه طريقه وليه عده معينه يعنى مثلا ندخل اولا على صيد الشط وصيد الشط ليه جزئيتين مهمين جدا
اولا الصيد بالبوصه اليد
يفضل طبعا البوصه تكون 7 متر او اكبر على حسب رغبتك طبعا والصيد بالبوصه اليد بيكون من على البلوكات او الصلبان او الموانى يعنى البوصه اليد لازم يكون تحتك غرق طبعا علشان تعرف ترمى ميكونش شط وتيجى تصطاد بالبوصه اليد
الصيد بالماكنه
الصيد بالمكنه من الشط لازم يكون معاك بوصه لاتقل عن 4.50 متر ومكنه متكنش تقيله يعنى مقاس 7000 ودا الصيد من على الشط زى الساحل وغيره وبتعمل رصاصه وقرمه وبتصطاد من على الارض
الكاست او التجريه بوصه تكون 3 او 360 ومكنه صغيره 6000 وهتحتاج جرنجوهات او بوبرات او ربلات طبعا وهنشرح الطرق دى كل صيد لوحده والصيد الكاست او التجريه بنشتغل بيه على الكليمارى بردو
صيد بطريقه التسقيط
الصيد ده بيعتمد على المركب يعنى اسمه تسقيط لانك بتسقط من على مركب بيكون معاك مكنه قويه وكبيره وافضل الانواع طبعا البانكس والفايكنج و الياموشى والاكوامارين وفى انواع تانيه محترمه ورخيصه بردو
البوصه من 1.80 سم حتى 270 ويفضل بوصه صب او بوصه اريال قويه تستحمل تقل الرصاصه وسبحه السمك
كده عرفنا الى هنحتاجو لصيد البحر
1 بوصه 7 متر او اكبر عادى مش هتفرق
2 بوصه مكنه للتشويح يبقى 4.50
3 بوصه كاست 3 او 360
4 بوصه تسقيط من 180 سم حتى 270
مكنه كبيره للتسقيط ومكنه للكاست والشط ينفع تشتغل بالمكنه للاتنين
والمكن فى انواع كتير جدا وخلى بالك مش بغلو العده يعنى مش علشان المكنه دى غاليه يبقى كويسه وهتخلينى اصطاد كتير لاء طبعا دى ارزاق وانت طبعا وحفاظك على عدتتك طبعا
نيجى بقى لصيد العزب ( البلطى )
مش محتاج كلام كتير منى لان صيده محدود وبيكون معاك بوصه يد 3 متر حتى 5 متر فقط والصيد ده بيكون فى الترع والمصارف او المزارع والصيد البلطى من اسهل انواع الصيد بالنسبه لناس كتير والبلطى بيحتاج طعم دود ارض او غله او عجينه او ريم او برغوت جمبرى صغير يعنى وكل طعمايه على حسب المياه الى السمك بياكل فيها على نوع معين وموسم البخ بتاعه فى شهر 4 فى صيد البلطى حاول ترفع العده شويه يعنى شعر اساسى 20 والترميل 18 او اقل ولو فى بلطى كبير كبر الشعر عادى
ملحوظه مهمه جدا
وانت بتختار عدتك لاول مره خد معاك واحد صاحبك يكون ليه خبره فى الصيد علشان العدد كتير والانواع اكتر هتختار العده المناسبه ليك وحاول متختارش الغالى من اول مره
انا كده خلصت ويارب اكون قدرت اوصل ولو معلومه بسيطه جدا ولو حد حابب يستفسر عن اى حاجه انا فى الخدمه وتحت امركم
اخوكم ايهاب ابو مريم
#مدرسه_المبتدئين_لتعليم_فنون_صيد_الاسماك
إرسال تعليق