طريقه تمليح الفسيخ فى المنزل _ طريقه سهله وبسيطه وامنه
بسم الله الرحمن الرحيم نبدأ على بركه الله
اولا قبل اى شىء لازم نعرف حاجهان مش اى سمكه تتملح يعنى مش هتجيب بورى وتملحه وخلاص لازم تكون عارف النوع الى هيتملح علشان ميبوظش منك او ينشف وهنقول ليه دلوقتى
اولا البورى الى هتجيبه يكون بورى عزب او مزارع مش بورى بحر علشان بورى البحر للاكل وممكن وهوا بيتملح ينشف منك وده عن تجربه شخصيه انت بقى ازاى تعرف ان البورى ده ينفع للتمليح ولا لاء
حضرتك بتروح اى سوق وبتختار السمكه الى بقها عريض مش مدبب يعنى متخدش ام بوز بتجيب حضرتك الكميه الى هتملحها يعنى مثلا سمكتين فى الكيلو او تلاته على حسب وبعد كده تاخد السمك البيت وتحت الحنفيه شطفه كويسه وفى ناس مش بتغسله عادى وبعد كده حضرتك بتجيب حاجه غويطه وبتوقف البورى لحد ما يصفى ميته خالص وبتحط داخل الخياشيم مناديل ورق بعد ما تتاكد ان الميا اتصفت منه خالص المناديل الورق بتضف بيها الخياشيم وبتزيل اى ميا داخل الخيشوم
بعد ما بتلاقى السمكه نشفت من الميا بتلاقى جسمها مسك ونشف بتعمل ايه بقى بتعملها تطريه مساج بالبلدى يعنى بتجيب السمكه ومن ضهرها بتضغط براحه فوق الشوكه بتاعه الضهر لحد ما تحس انها طرت شويه ومن عند الديل نفس الكلام
ليه بقى علشان سلسله الضهر الشوكه يعنى تنفصل عن السمكه بعد التمليح وبعد كدا وبعد ما السمك كله عملته بنفس الطريقه
هنجيب بقى شويه حجات كده
اولا ملح خشن
كركم وشطه
ليمون
هتجيب طبق وسط وتحط كبشه ملح مع الكركم والشطه حسب الرغبه طبعا ونخلطهم على بعض ونمسك السمكه ونفتح خيشومها ونحشيه بالخلطه دى تمام وبندهن جسمها برده هنعمل كده فى الكميه الموجوده وهنجيب 10 كياس بلاستيك وكيس اسمر هنحط السمك فى الكيس الاول ويفضل الكيس 4 سمكات بس هنحط المكه خلف خلاف التانيه يعنى انت حطيت السمكه راسها من اليمين يبقى التانيه ديلها يمين وهكذا فى الاربع سمكات يبقى عكس بعض تمام كده
بعد ما حطيط الكميه بتاعتك لو فضل خلطه هترشها على السمك داخل الكيس وهتجيب اللمون تقطعه نصفين وتسيبه داخل الكيس وبعد كده شويه زيت صغيرين رشه بس على السمك من الوش متكترش زيت
اهم خطوه خلى بالك
تقفل الكيس وتفرغ منه الهوا خالص وتربطه ربطه كويسه جدا وتجيب الكيس التانى تحط فيه الكيس الاول ونعمل زى الاول وهكذا حتى الكيس الاخير وبعد كده الكيس الاسود وتجيب علبه كبيره على قد الكياس دى بغطى هتحط فيها السمك وتسيبه فى مكان تحت الحوض مثلا او مكان بعيد عن اى حراره وكل يومين تمسك الكيس تفتح العلبه وتقلب الكيس على النحيه التانيه يومين وتقلبه بردو وبعد 15 او 20 يوم حضرتك بتفتح عليه وانا قولت 15 او 20 يوم ليه علشان نسبه رطوبه الجو يعنى الصيف 15 يوم والشتا بيقعد اكتر شويه
إرسال تعليق